Իտալական «Ինտերի» կիսապաշտպան Հենրիխ Մխիթարյանը վնասվածք ստացավ «Միլանի» դեմ Չեմպիոնների լիգայի կիսաեզրափակիչի պատասխան խաղի առաջին խաղակեսում։
44-րդ րոպեին Հայաստանի հավաքականի նախկին ավագը փոխարինվեց մկանային վնասվածքի պատճառով։ Նրա փոխարեն խաղադաշտ դուրս եկավ խորվաթ կիսապաշտպան Մարսելո Բրոզովիչը:
Առաջին խաղակեսն անցավ գրեթե հավասար պայքարում և ավարտվեց 0-0 հաշվով: «Ինտերի» ֆուտբոլիստները կատարեցին 7 հարված, որից մեկն էր դիպուկ: «Միլանի» ֆուտբոլիստները կատարեցին չորս հարված, կրկին մեկն էր դիպուկ: «Միլանն» առաջին խաղակեսի 54 տոկոս ժամանակահատվածում վերահսկում էր գնդակը:
Հիշեցնենք, որ «Ինտերը» դիմակայության առաջին մրցավեճում հաղթել էր 2-0 հաշվով, 34-ամյա Մխիթարյանը դարձել էր գոլի հեղինակ և ճանաչվել խաղի լավագույն ֆուտբոլիստ: Հայաստանի հավաքականի պատմության լավագույն ռմբարկուն ընթացիկ մրցաշրջանում «Ինտերի» կազմում մասնակցել է 48 հանդիպման, դարձել 5 գոլի և երկու գոլային փոխանցման հեղինակ: