Թուրքիայի հավաքականի գլխավոր մարզիչ Շտեֆան Կունցը Երևանում կայացած նախախաղային ասուլիսում անդրադարձել է Հայաստանի հավաքականի դեմ Եվրո-2024-ի ընտրական փուլի D խմբի առաջին տուրի խաղին։
«Միանշանակ կարող եմ ասել, որ մենք ցանկանում ենք գնալ Գերմանիա, ցանկանում ենք նվաճել Եվրոպայի առաջնության եզրափակիչ փուլի ուղեգիր:
Ընդհանուր առմամբ կան սկզբունքներ, որոնցով մենք առաջնորդվում ենք: Կազմի ընտրության հետ կապված կարող եմ ասել, որ ունենք երեք կամ չորս տարբերակ՝ պաշտպանողական կամ հարձակողական, դա կախված է իրավիճակից:
Եթե վերլուծենք Հայաստանի հավաքականի խաղը նախքան կորոնավիրուսը, ապա հայկական ֆուտբոլն ավելի շատ իր ոճով նման էր իսպանականին, այնուամենայնիվ, այդ վերլուծությունները հնացած են, քանի որ ձեր գլխավոր մարզիչը փոխվել է:
Կարող ենք ասել, որ Հայաստանի հավաքականի կազմն ավելի երիտասարդացել է և դուք ունեք թե «Բավարիայից» եկած խաղացող, թե Ռուսաստանի մինչև 21 տարեկանների հավաքականի խաղերին մասնակցած ֆուտբոլիստ:
Այնպես որ, այս վերլուծությունները կարելի է հնացած համարել և ես կենտրոնանալու եմ, որ իմ հավաքականը վաղը պատրաստ լինի խաղին: Այս խաղում պարտվելու սցենար չեմ դիտարկում»,- ասել է գերմանացի մասնագետը:
Հիշեցնենք, որ 60-ամյա Շտեֆան Կունցը 2021 թվականի սեպտեմբերից է աշխատում Թուրքիայի ազգային հավաքականում։ Դրանից առաջ նա 5 տարի գլխավորել է Գերմանիայի երիտասարդական հավաքականը։
Հայաստան – Թուրքիա հանդիպումը կկայանա մարտի 25-ին Վազգեն Սարգսյանի անվան «Հանրապետական» ստադիոնում և կմեկնարկի ժամը 21։00-ին։ Դա Հայաստանի հավաքականի առաջին հանդիպումը կլինի Ալեքսանդր Պետրակովի գլխավորությամբ։ Եվրո-2024-ի ընտրական D խմբում ընդգրկված են նաև Խորվաթիան, Ուելսը և Լատվիան։
Հայաստան - Թուրքիա․ Դիմակայությունների պատմությունը (տեսանյութ, ֆոտո)
Վարազդատ Հարոյան․ «Հենրիխ Մխիթարյանի ներկայությունը շատ կհեշտացներ մեր գործը»
Ալեքսանդր Պետրակով․ «Փորձում եմ փոխել հայ ֆուտբոլիստների մտածելակերպը»